Мимикрија
Зар има трагедија која не се случила дома?
Вон семејството?
Надвор?
Се шегувате?
Тука е битието, тука дво-смислата
тука, она кое е попатно за другите
станува клучно за нас
ни ги отвора очите одвнатре
гледа со нас, харизматично
со мимики општиме
и гестови
секој изречен збор
причина за нелагодност
недоразбирања
татко ми никогаш не го изговори
Нејзиното име
Таа и онака ќе дојде ненадејно
гротескно
ќе ги испреврти сите вредности
потем долго ќе се преправаме
- не сме виделе ништо
мистериозно
божем не ни' се чита
по интонацијата
по отсутноста
по расеаноста!
